Ingamba zo guhashya COVID-19 mu Rwanda zikomeje kuba intangarugero ku rwego mpuzamahanga. Mu buryo budasanzwe , Donna Edna Shalala umwe mu bayobozi bakomeye muri Leta Zunze Ubumwe z’Amerika (USA) yanenze imiyoborere y’Igihugu ke, atanga rugero ku buryo cyarushijwe ukwitwararika n’Igihugu gito muri Afurika.
Donna Edna Shalala ni umunyapolitiki akaba n’impuguke mu burezi, uhagarariye Leta ya Florida mu Nteko Ishinga Amategeko ya Leta Zunze Ubumwe z’Amerika guhera mu mwaka wa 2019.
Ni “Umudemokarate wigeze kuba Umunyamabanga wa Leta Zunze Ubumwe z’Amerika wa 18 ushinzwe Ubuzima n’Ibikorwa bya Muntu (Health and human Services); icyo gihe hari ku buyobozi bwa Perrezida Bill Clinton hagati ya 1993 na 2001.
Mu kiganiro yagiranye na tereviziyo MSNBC, Donna Shalala yagaragaje akaga abayobozi n’abaturage ba Leta Zunze Ubumwe z’Amerika barimo muri ibi bihe by’icyorezo, bitewe n’umubare w’abandura n’abapfa ukomeza kugenda wiyongera uko bukeye n’uko bwije, kubera uburyo icyo cyorezo kitahawe uburemere bwacyo rugikubita.
Kugeza ubu muri Amerika hamaze gutahurwa abarwayi ba COVID-19 barenga miriyoni 2 n’ibihumbi 630 barimo abakabakaba ibihumbi 130 bamaze guhitanwa na yo.
Ubwo yari abajijwe ku mibare ikomeje kwiyongera muri Leta ya Florida ahagarariye, Dona Shalala yavuze ko bikomeje guterwa no kuba inzego z’ubuyobozi zitarafashe ingamba zihamye rugikubita, aho nta n’itesinda ryigeze rishyirirwaho gukurikirana abahuye n’abarwayi batahuwe.
Yagize ati “Abantu 9,000 mu munsi umwe, bakaba ibihumbi 29 mu minsi 7, ni akumiro. Ni ikigaragaza uburyo imiyoborere yatsinzwe ku buryo buteye ubwoba, harimo iya Guverineri na Perezida wacu. Ba Meya baragerageza gukora ibishoboka ngo bakore igikwiriye. Nta tsinda ry’abakozi dufite ryo gukurikirana abahuye n’abarwayi.”
Aha ni ho yatanze urugero ku Rwanda, agira ati: “Umva, u Rwanda muri Afurika, mu baturage miriyoni 12 rufite, harimo abakozi 60,000 bose bashinzwe gukurikirana abahuye n’abarwayi ba COVID-19. Twebwe ntidufite n’umwe, kandi naravuze mu mezi ashize ko ikintu kibi cyane kizatubaho ari uguterwa tutiteguye.”
Nyuma y’ubushakashatsi bikomeje kugaragaza u Rwanda mu bihugu mbarwa by’Afurika byafashe ingamba zo kwirinda ikwirakwizwa rya COVID-19, amahirwe y’ubuhahirane n’amahanga akomeje kwiyongera.
Ubushakashatsi buheruka gukorwa n’Ikigo cy’Abadage gishinzwe kurinda no guhangana n’indwara, The Robert Koch Institute (RKI), bwagaragaje ko u Rwanda ruri mu bihugu by’Afurika umunani gusa, bitagiteje impungenge ku bijyanye n’uko abantu bahagenda bashobora guhura n’ibyago byo kwandura iCOVID-19.
Mu mpera z’iki cyumweru na none, Inama yahuje ibihugu by’i Burayi (EU) yemeje gusubukura ingendo z’amahanga mu gace ka Schengen kagizwe n’ibihugu 26 guhera tariki 01 Nyakanga 2020, u Rwanda rukaba ruri mu bihugu bine gusa by’Afurika byemerewe kuba abaturage bwarwo bahakorera ingendo, kubera kurwanya neza icyorezo cya COVID-19.
Ubwanditsi:@umuringanews.com
